లేఅవుట్ క్లియరెన్స్ నివేదిక కోసం రూ.30 లక్షలు డిమాండ్ చేసినట్లు ఆరోపణలు
రంగారెడ్డి | వారధి న్యూస్: అవినీతి నిరోధక శాఖ (ఏసీబీ) వలలో రంగారెడ్డి జిల్లా అబ్దుల్లాపూర్‌మెట్ తహశీల్దార్ బోడ సుదర్శన్ రెడ్డి, మండల సర్వేయర్ బటుక శ్రీనివాసులు చిక్కారు. లేఅవుట్ క్లియరెన్స్‌కు సంబంధించిన నివేదిక జారీ చేసే విషయంలో ఓ రియల్ ఎస్టేట్ వ్యాపారి నుంచి రూ.20 లక్షలు లంచం తీసుకున్నారనే ఆరోపణలపై ఏసీబీ అధికారులు వారిని అరెస్ట్ చేసినట్లు సమాచారం.
రూ.30 లక్షల డిమాండ్.. రూ.20 లక్షలకు ఒప్పందం
ఏసీబీ అధికారుల వివరాల ప్రకారం.. ఓ ప్రైవేట్ భూమికి సంబంధించిన లేఅవుట్ అనుమతుల కోసం ఉమ్మడి తనిఖీ నివేదిక ఇవ్వాల్సి ఉంది. ఈ నివేదికను క్లియర్ చేసి ఉన్నతాధికారులకు పంపేందుకు తహశీల్దార్ సుదర్శన్ రెడ్డి, మండల సర్వేయర్ శ్రీనివాసులు కలిసి రూ.30 లక్షలు డిమాండ్ చేసినట్లు ఆరోపణలు ఉన్నాయి. చివరకు రూ.20 లక్షలు ఇచ్చేలా ఒప్పందం కుదిరినట్లు సమాచారం.
లంచం ఇవ్వడానికి ఇష్టపడని బాధితుడు ఏసీబీ అధికారులను ఆశ్రయించడంతో వారు పథకం ప్రకారం నిఘా ఏర్పాటు చేశారు.
కార్యాలయంలో ఏసీబీ దాడి
తహశీల్దార్ కార్యాలయంలో సర్వేయర్ శ్రీనివాసులు ద్వారా వచ్చిన రూ.20 లక్షల నగదును సుదర్శన్ రెడ్డి స్వీకరిస్తుండగా ఏసీబీ అధికారులు దాడి చేసినట్లు సమాచారం. రసాయన పరీక్షల ద్వారా నగదును తాకినట్లు నిర్ధారించేందుకు అధికారులు పరీక్షలు నిర్వహించినట్లు పేర్కొన్నారు.
లంచం సొమ్మును స్వాధీనం చేసుకున్న ఏసీబీ అధికారులు ఇద్దరినీ అదుపులోకి తీసుకుని అరెస్ట్ చేశారు.
ఇళ్లు, కార్యాలయాల్లో సోదాలు
ఈ కేసుకు సంబంధించి అబ్దుల్లాపూర్‌మెట్ తహశీల్దార్ కార్యాలయంతో పాటు హైదరాబాద్, వరంగల్‌లోని నిందితుల నివాసాల్లో ఏసీబీ అధికారులు సోదాలు నిర్వహించినట్లు సమాచారం. ఆస్తుల పత్రాలు, బ్యాంకు ఖాతాలు, లాకర్లకు సంబంధించిన వివరాలను పరిశీలిస్తున్నట్లు తెలిసింది.
గతంలో సుదర్శన్ రెడ్డి పనిచేసిన ప్రాంతాల్లోనూ అక్రమాలకు పాల్పడినట్లు ఆరోపణలు ఉన్నాయనే అంశంపై అధికారులు దర్యాప్తు చేస్తున్నట్లు సమాచారం. నిందితులను ప్రత్యేక ఏసీబీ న్యాయస్థానం ముందు హాజరుపరచనున్నట్లు అధికారులు వెల్లడించినట్లు సమాచారం.
